Консерватория жаңалықтары

28 мамыр күні сағат 17:00-де Құрманғазы атындағы Қазақ ұлттық консерваториясының Е.Рахмадиев атындағы Үлкен концерт залында «Үрмелі және ұрмалы аспаптар» кафедрасының есеп беру концерті өтпек. Концертте кафедра ұстаздары, магистранттары және студенттері өз өнерлерін ортаға салатын болады.

23 мамыр күні Құрманғазы атындағы Қазақ ұлттық консерваториясының Ф.Шопен атындағы камералық залында «Міндетті фортепиано» аталымы бойынша І Халықаралық «GASISA» байқауында лауреат атанған студенттерімізді марапаттау рәсімі өтті.

Бүгін консерваторияның Е.Рахмадиев атындағы Үлкен концерт залында жуық арада өткелі жатқан жалпыхалықтық референдумға байланысты іс-шара өтті.

Дәулескер күйші, қазақтың домбыра күйшілік дәстүрін ғылыми негізде әлемге әйгілеуші ғалым Базаралы Мүптекеевтің «Жетісудың оңтүстік-шығысындағы күйшілік дәстүр» атты монографиясының, «Күй шақыртқы» деп аталатын күйлер жинағы мен CD күйтабағының тұсаукесер салтанаты өтеді.

Бүгін Құрманғазы атындағы Қазақ ұлттық консерваториясының А.Жұбанов атындағы Кіші концерт залында «Скрипка музыкасының концерті» өтті.

2022 жылдың бірінші тоқсанында Құрманғазы атындағы Қазақ ұлттық консерваториясы «Домбыра» кафедрасы ұстаздарының бірнеше еңбектері жарыққа шықты. Күй өнеріне қосылған келелі еңбектерді құрастырушылар қатарында ҚР Еңбек сіңірген артисі, профессор Айгүл Нариманқызы Үлкенбаева, Қазақстанның еңбек сіңірген қайраткері, профессор Карима Сүндетқызы Сахарбаева, ҚР мәдениет қайраткері, доцент Қуаныш Жұмағали Ізімұлы және ҚР Мәдениет қайраткері, профессор, «Домбыра» кафедрасының меңгерушісі Төлепберген Төрахметұлы Тоқжанов пен ұстаз Динара Аманкелдіқызы Нұрбаева бар.
Күйші-ұстаз Айгүл Үлкенбаеваның «Түркі әлемінің ұлы композиторы – Дина Нұрпейісова» атты кітабының таныстырылымы ҚР Ұлттық кітапханасында өтті. Қазақ, орыс, түрік, ағылшын тілдерінде жарық көрген кітап күйші Дина Нұрпейісованың 160 жылдық мерейтойына орай Атырау облысының Мәдениет, тілдерді дамыту және архив ісі басқармасының қолдауымен жарыққа шықты. Кітаптың тұсаукесер лентасын танымал жазушы, публицист Мереке Құлкенов пен Құрманғазы атындағы Қазақ ұлттық консерваториясының ректоры, күйші, дирижер Арман Жүдебаев қиды.

19 мамыр күні Құрманғазы атындағы Қазақ ұлттық консерваториясының Ф. Шопен атындағы камералық залында Ағарту дәуірінің атақты композиторы Георг Фридрих Гендельдің скрипка мен фортепианоға арналған сонаталары орындалған камералық музыка кеші өтті.
Концерттік бағдарламада атақты композитордың № 2, 4 және 6-сонаталары орындалды. Жиналған тыңдарман қауымның құлақ құрышын қандырған музыкалық туындыларды скрипкада Еркін Мырзағалиев құйқылжытса, Қанат Мәлікайдар фортепианода сүйемелдеп, өз шеберлігін танытты.

19 мамыр күні Құрманғазы атындағы Қазақ ұлттық консерваториясының А. Жұбанов атындағы кіші залында Қазақстанның Халық артисі, Мемлекеттік сыйлықтың лауреаты, Қазақ Ұлттық музыка академиясының академигі, «Қазақстан Камератасы» классикалық музыка ансамблінің негізін қалаушысы әрі көркемдік жетекшісі, қазақстандық әлемге әйгілі скрипкашы, педогог, Құрманғазы атындағы Қазақ ұлттық консерваториясының профессоры Гауһар Құрманбекқызы Мырзабекованың кластық концерті өтті.
Концерттік бағдарламада А. Вьетанның скрипка мен оркестрге арналған 5-концерті, Ф. Мендельсон скрипка мен оркестрге арналған концертінің І бөлімі, С. Прокофьевтің  І концертінің ІІ және ІІІ бөлімдері, П. Чайковскийдің концертінің І бөлімі, А. Глазуновтың скрипка мен оркестрге арналған концерті, Я. Сибелиустың скрипка мен оркестрге арналған концертінің І, ІІ, ІІІ бөлімдері орындалды. Орындаушылар қатарында Шанайя Шакир, Леонид Константинов, Тоғжан Шәкерімова, Мәншүк Қазиева, Әділет Әбдірахманов, Айлин Акинер, Абзал Әшкенов бар. Фортепианода сүйемелдеген Шолпан Оңғарова. Концертке жиналған көрермен орындаушылардың кәсіби шеберліктеріне тәнті болды.

19 мамыр күні консерваториямыздың конференц-залында студенттік өзін-өзі басқару ұйымдарымен (клубтарымен) 2021-2022 оқу жылының «Жаңа Қазақстан: жастар және өнер» атты қорытынды кездесуі өтті.
Студенттік өзін-өзі басқару ұйымдарының жетекшілері мен белсенді мүшелері қатысқан кездесуді Тәрбие және әлеуметтік жұмыстар жөніндегі проректор Ешмұханов Мұхамбет Ашхатұлы жүргізді.