Консерватория жаңалықтары

InClassica халықаралық музыкалық фестивалі аясында Мальта классикалық музыка академиясы 2021 жылдың  17 сәуірі мен 11 мамыры аралығында Мальтада өтеді.

Қымбатты достар! «Nur Otan» партиясы Алматы қалалық филиалы Саяси кеңес бюросының шешімімен «Қазақстан Республикасындағы сайлау туралы» Конституциялық заңның 112-бабының 1-тармағына сәйкес құрамында 29 кандидат бар тізім бекітілді. Аталған тізім бойынша Құрманғазы атындағы Қазақ ұлттық консерваториясының ректоры, ҚР еңбек сіңірген қайраткері Жүдебаев Арман Әділханұлы Алматы қалалық мәслихатының депутаты болып сайланды.
- Мемлекет басшысы Қасым-Жомарт Кемелұлы Тоқаевтың Тәуелсіздігіміздің 30 жылдығына арналған «Тәуелсіздік бәрінен қымбат» атты мақаласында «Біздің мақсатымыз – келер ұрпаққа Қазақстанды тұғыры мығым, экономикасы қуатты, рухы асқақ мемлекет ретінде табыстау және елдік істерді шашау шығармай лайықты жалғастыратын жасампаз ұрпақ тәрбиелеу» деп атап өткен болатын. Өмір бір орында тұрмайды. Қазіргі таңда елімізде жаңаша ойлайтын, жаңа заманның талаптарына ұлттық құндылықтарымызды жоғалтпай бейімделе алатын қоғам қалыптастыру керектігі өзекті мәселе болып тұр деп есептеймін. Бұл тұрғыда білім мен өнер, мәдени құндылықтар бірінші орынға шығады. Республикамыздағы тарихы терең, маңдайалды жоғары оқу орындары шоғырланған, өнер мен мәдениет орталығына, жастар қаласына айналған, ең ірі мегаполисіміз – Алматы шаһарының жан-жақты дамуына, әсіресе өнер-білім жүйесі мен мәдениет саласынының уақыт талабына сай өркендеуіне мейлінше күш салғанымыз жөн, - деді сөзінде ректор Арман Жүдебаев.
Арман Әділханұлы кәсіби біліктілігі мен еңбекқорлығының арқасында жас та болса көп биіктерді бағындырып, қазіргі таңда ұлттық музыка өнеріміздің қарашаңырағы – Құрманғазы атындағы Қазақ ұлттық консерваториясын басқарып отыр. Дарынды күйші, дирижер ретінде халық сүйіспеншілігіне бөленген майталман өнерпаз, соңғы жылдары білікті басшы ретінде консерватория ұжымы алдында өзінің тиянақтылығы, жауапкершілігі және басшыға тән талапшылдығымен жоғары беделге ие болып отыр.
Консерватория ұжымы Арман Әділханұлын құттықтай отырып, депутаттық қызметінде сәттілік тілейді.

2020 жылдың 13 қаңтарында Құрманғазы атындағы Қазақ ұлттық консерваториясының ректоры Арман Жүдебаев М.Әуезов атындағы Қазақ Ұлттық драма театрының құрылғанына 95 жыл толуына және "Ұлттық" мәртебесі берілуіне арналған мерекелік іс-шараға қатысты.

Қазақстан Республикасы Мәдениет және спорт министрлігінің қолдауымен өткен іс-шараға ведомства басшысы Ақтоты Райымқұлова, «Ұлттық» мәртебесін иеленген М.Әуезов атындағы Қазақ Ұлттық драма театрының көркемдік жетекшісі, КСРО Халық артисі – А.Әшімов; М.Әуезов атындағы Қазақ Ұлттық драма театрының директоры, Қазақстанның еңбек сіңірген қайраткері - Е.Жуасбек; Абай атындағы Қазақ Ұлттық опера және балет театрының директоры, Қазақстанның еңбек сіңірген қайраткері – А.Қалиева; М.Ю.Лермонтов атындағы Ұлттық орыс драма театрының директоры – А.Якушев; Құрманғазы атындағы Қазақ Ұлттық халық аспаптар оркестрінің директоры – М.Қуанышев; ҚР Ұлттық кітапханасының директоры – Б.Оспанова қатысты.

Арман Әділханұлы қарашаңырақты 95 жылдық мерейтойымен құттықтап, консерватория ұжымы атынан құттықтау хатын табыстады.

2020 жылдың 30 желтоқсанында Құрманғазы атындағы Қазақ ұлттық консерваториясында ZOOM платформасы арқылы онлайн жиналыс өтті. Шараға «Sanaly urpaq» Республикалық жобалық кеңсесінің жетекшісі Тоқышев Қайыржан Ахметбекұлы және консерваторияның сыбайлас жемқорлыққа қарсы қоғамдық кеңесінің мүшелері қатысты. Жиын модераторы кеңес жетекшісі, «Жалпы фортепиано» кафедрасының меңгерушісі Олексенко И.В. болды.
    Жиналыста ISO 37001 халықаралық стандарты талаптары бойынша сыбайлас жемқорлыққа қарсы менеджмент жүйесінің халықаралық сертификаттау жобасы жөнінде талқыланды. Қайыржан Ахметбекұлы консерватория басшылығының бұл бағыттағы жұмыс нәтижелеріне жоғары баға берді.

Елбасы Нұрсұлтан Әбішұлы Назарбаев консерватория ректоры Арман Әділханұлын Жаңа жыл мерекесімен құттықтады.

Қымбатты достар! Қазақстан халқы ассамблеясы – тұрақтылық пен бейбітшіліктің жаршысы. ҚР Тұңғыш Президенті, Елбасы Нұрсұлтан Назарбаевтың жеке бастамасымен құрылған ұйым бүгінге дейін көптеген игі істердің бастамашысы да болып келеді. Қазақстан бірлігінің моделін қалыптастыруда маңызды рөл атқарған ассамблеяның құрылғанына биыл 25 жыл толып отыр. Осыған орай бүгін консерваториямыздың «Халық әні» кафедрасының ұстаздары, ҚР еңбек сіңірген қайраткерлері Еркін Шүкіманов пен Ұлжан Байбосынова "Қазақстан халқы ассамблеясына 25 жыл" мерекелік төсбелгісіне ие болды.
Қазақстан Республикасының Білім және ғылым министрі Аймағамбетов Асхат Қанатұлының тәуелсіз Қазақстанның рухани және әлеуметтік дамуы жолында білім беру жүйесін дамытуға және білім беру сапасын арттыруға қосқан үлесі үшін Жәмеңкеев Ержан Ерболатұлы, Мәтжанова Қарлығаш Көкенайқызы, Романенко Александр Александрович, Сүлеева Гүлжан Созақбайқызы және Оспанова Тоғжан Өмірзаққызына Құрмет грамотасы табысталды. Сондай-ақ министрдің арнайы Алғыс хатымен ҚР жоғары білім беру жүйесінде жас мамандарды даярлауға қосқан үлесі үшін Аденова Алтынай Күмісбекқызы, Гавриленко Ирина Анатольевна, Далбағай Гүлфайруз Есімханқызы, Нуридин Нұрасыл Нуридинұлы мен Чалова Оксана Викторовна марапатталды.
Консерватория ұстаздарын аталмыш марапаттарымен шын жүректен құттықтаймыз!

Бүгін ҚР Тәуелсіздік күніне орай Елбасы Н.Ә. Назарбаевтың «Болашаққа бағдар: рухани жаңғыру» атты бағдарламалық мақаласы аясында ҚР Білім және ғылым министрлігі «Bilim-orkenieti» ұлттық инновациялық ғылыми зерттеу орталығының ұйымдастыруымен еліміздің  студенттері мен магистранттарын  қолдау мақсатында, Алматы қаласы Қазақстан халқы Ассамблеясы Алматы қаласындағы Достық үйінде «Тәуелсіз елдің көшбасшы жастары» атты конференция ұйымдастырды.
Конференция барысында «Үздік Студенттер Академиясына» қабылданатын дарынды жастарды марапаттау, сонымен қатар «Жылдың Үздік ұстазы - 2020», «Үздік Жас маман - 2020» және «Қазақстанның Құрметті педагогы» байқауларының жеңімпаздары марапатталды. Шара нәтижесі бойынша «Үздік Студенттер Академиясына» консерваториямыздан Аязбаева Анар, Ерназар Әбдібек, Ильмурадов Самат, Байқожа Камила, Сафиева Жанель, Сагимбаев Абулхаир, Ерланова Анель, Макар Гани, Ерболов Нурлан, Абдулла Ержан, Қазкенов Дастан және Әшімхан Нұрғали қабылданды. Жеңімпаздар құттықтау хат  және арнайы төсбелгімен марапатталды.
Әр номинация бойынша жеңімпаздарды консерватория ректоры Арман Әділханұлы Жүдебаев марапаттады.
Консерватория ұжымы «Үздік Студенттер Академиясына» қабылданған жастарды шын жүректен құттықтап, шығармашылық табыс тілейді!

ҚР Президенті Қасым-Жомарт Кемелұлының жарлығына сәйкес, қазақ музыкасының қарашаңырағы Құрманғазы атындағы Қазақ мемлекеттік академиялық халық аспаптары оркестрі «Ұлттық» мәртебесіне ие болды. Осыған орай бүгін оркестр залында мерекелік іс-шара өтті.
Құрманғазы оркестрі академик Ахмет Жұбанов ХХ ғасырдың алғашқы жартысында құрған сәттен бастап ұлттық болмысымызды әлемге танытып келе жатыр. Елбасымыз кезінде «Қазақтың інжу-маржаны» деп баға берген оркестр бүгінде бүкіл әлемге халқымыздың музыкалық өнерін, бірегей музыкалық аспаптарын және Ұлы дала әуенінің құдыретін танытып келеді.