Консерватория жаңалықтары

2021 жылдың 3 наурызында Құрманғазы атындағы Қазақ ұлттық консерваториясының жатақханасында студенттердің қатысуымен кураторлық сағат өтті.

Шараға  Тәрбие және әлеуметтік жұмыс жөніндегі проректор м.а. Ешмұханов М.А., жалпы практика дәрігері, терапевт – Оңғарбаева Айзере Бекайспайқызы, учаскелік медбике - Жомартова Жаңылхан Болатбекқызы қатысты.

Кураторлық сағатта қонақтарымыз консерватория студенттеріне коронавирустық инфекция, туберкулез, салауатты өмір салты сияқты тақырыпта түсіндірме жұмыстарын жүргізді.

Кездесу барысында студенттер өздерін мазалап жүрген сұрақтарды қойып, арнайы мамандардан кәсіби жауап алды.

«Құрманғазы атындағы Қазақ ұлттық консерваториясы» РММ «Гуманитарлық
ғылым және Өнер» бағытында 7 мамандық (17 номинация) бойынша 2021 жылы ҚР
БжҒМ XIII Республикалық студенттік пәндік олимпиадасын онлайн форматта өткізеді.

1 наурыз - «Алғыс айту күні» аясында Құрманғазы атындағы Қазақ ұлттық консерваториясының студенттері Қарттар үйінде қайырымдылық концерт ұйымдастырды.

Іс-шараның басты мақсаты – қарттарымызға құрмет көрсету, жас ұрпаққа үлгі ретінде насихаттау.

Қарттардың қуанышты жүздері мен ыстық лебіздері студенттер үшін ең жоғары марапат болып, жастарды жақсы істерге жігерлендірді.
Ұйымдастырушылардың айтуы бойынша осындай іс-шаралар әлі де жалғасын таппақ.

2021 жылдың 24 ақпан күні Құрманғазы атындағы Қазақ ұлттық консерваториясында ZOOM платформасы арқылы кураторлық сағат өтті. Шараға консерваторияның Сыбайлас жемқорлыққа қарсы іс-қимыл жөніндегі Қоғамдық кеңесінің төрағасы Олексенко И.В. «Sanaly urpaq» студенттік клубының төрайымы Аширова А.М., Тәрбие және әлеуметтік жұмыстар жөніндегі проректоры Ешмұханов М.А., Студенттер және түлектермен жұмыс жасау бөлімінің қызметкерлері қатысты.
Кураторлық сағаттың негізгі міндеті – ҚР ЖОО қызметіндегі сыбайлас жемқорлыққа итермелейтін жайттардың алдын алу, оларды шешу жолдары мен мәселелерін анықтау.
Консерватория басшылығы студенттердің сұрақтарына жауап беріп, жастардың сыбайлас жемқорлыққа қарсы дүниетанымын қалыптастыру ісінде әдістемелік көмек көрсетуді ұсынды. Сондай-ақ студенттерге арнайы сыбайлас жемқорлыққа қарсы дайындалған бейнеролик көрсетілді.

Бүгін Құрманғазы атындағы Қазақ ұлттық консерваториясының ректоры, ҚР еңбек сіңірген қайраткері Арман Әділханұлы Жүдебаев мемлекет басшысы Қасым-Жомарт Кемелұлы Тоқаевтың Алғыс хатына ие болды. Халқымыздың ұлы ақыны Абай Құнанбайұлының 175 жылдық және дала данышпаны, әлемнің екінші ұстазы Әбу Насыр әл-Фарабидің 1150 жылдық мерейтойларына арналған іс-шараларды ұйымдастыру мен өткізуге қосқан үлкен үлесі үшін берілген марапатты ҚР Мәдениет және спорт министрі Ақтоты Рахметоллақызы табыстады. Консерватория ұжымы Арман Әділханұлын марапатымен құттықтап, әрқашан мерейі үстем болып, абыройы арта берсін деген тілек білдіреді!

Бүгін «Рухани жаңғыру» қазақстандық қоғамдық даму институты» коммерциялық емес акционерлік қоғамы мен Құрманғазы атындағы Қазақ ұлттық консерваториясы арасында ынтымақтастық туралы меморандумға қол қойылды. Шараға «Рухани жаңғыру» қазақстандық қоғамдық даму институты» КеАҚ төрағасы Данияр Нұрашұлы Есин, консерватория ректоры м.а. Оқу және оқу-әдістемелік жұмыстар жөніндегі проректор Әбдірахман Гүлнар Бахытқызы, Тәрбие және әлеуметтік жұмыстар жөніндегі проректор м.а. Ешмұханов Мұхамбет Ашхатұлы мен консерваториямыздың бірқатар қызметкерлері қатысты. Меморандумның негізгі мақсаты «Рухани жаңғыру» бағдарламасын ілгерілету, оның әдіснамалық және ғылыми-зерттеу негізін нығайту саласында тікелей және өзара тиімді ынтымақтастық орнату болып отыр.

Бүгін 05.02.2021 ж. ZOOM платформасында конференция өтті, оған Қазақстан Республикасы Сыбайлас жемқорлыққа қарсы іс-қимыл агенттігінің төрағасы А.Ж. Шпекбаев, Алматы қаласы аудандарының әкімдері, ҚР Мәдениет және спорт министрлігінің «Адалдық алаңы» жобалық кеңсесінің өкілдері, «Sanaly yrpaq» жобалық кеңсесінің жетекшісі К.А. Тоқышев және «IZGILIK ELSHISI» жобалық кеңсесінің өкілдері, сондай-ақ Алматы қаласының жоғары оқу орындарының ректорлары мен проректорлары қатысты. Консерватория атынан: тәрбие және әлеуметтік жұмыс жөніндегі проректор М.А. Ешмұханов, сыбайлас жемқорлыққа қарсы іс-қимыл жөніндегі Қоғамдық кеңестің төрағасы, жалпы фортепиано кафедрасының меңгерушісі И.В. Олексенко, кеңес мүшелері К.М. Азубаев және А.М. Аширова қатысты.
Бүгінгі іс-шарада 2020 жылы сыбайлас жемқорлыққа қарсы іс-қимыл бойынша атқарылған жұмыстар таныстырылды және 2021 жылға жаңа міндеттер қойылды, студенттік, оқытушылық және қоғамдық ұйымдардың жұмысына әдістемелік ұсыныстар мен көмек көрстету, ықпал ету тұстары анықталды. Қазіргі уақытта ең басты міндеттердің бірі сыбайлас жемқорлыққа қарсы аудитті жүзеге асыру жөніндегі ұсынысты қарау болып табылатыны атап өтілді. Бірқатар іс-шаралар, вебинарлар, кездесулер және т. б. өткізу жоспарлануда.
Кездесу соңында Қазақстан Республикасы Сыбайлас жемқорлыққа қарсы іс-қимыл агенттігінің төрағасы А.Ж. Шпекбаев және республикалық жобалау офистерінің басшылары атқарған жұмыстары үшін ризашылықтарын білдіріп, жұмыстарына табыс тіледі.

Біз бүгін Алматы консерваториясының 1983 жылғы түлегі, композитор Алексей Руфович Котельников жайлы сөз қозғамақпыз. Алексей Руфович 1957 жылы Орынбор облысындағы Илек ауылында мұғалімдер отбасында дүниеге келген. Бала жасынан бастап баян аспабына қызығып, үйрене бастайды.
Ата-анасымен Орал қаласына қоныс аударғаннан кейін ол жаңа мектебінде В.В.Новенкованың жетекшілігімен баяншылар үйірмесіне қатысып, көркемөнерпаздардың қойылымдарында да белсенділік танытып жүреді. 1974 жылы Алексей Руфович Орал музыкалық училищесіне Н.Г.Новенькованың сыныбына түседі.
А.Р.Котельниковтың алғашқы шығармашылық тәжірибесі 1974-1975 жылдардан бастау алады, бұл кездері ол орыс халқының билері мен әндерін өңдеумен айналысқан. Сол жылдары Алексей орыс халық аспаптары оркестріне арналған өз туындыларын жаза бастайды. 1978 жылы ол училищені аяқтап, Алматыдағы консерваторияға оқытушы С.С.Сейтхановтың сыныбына оқуға түседі. Консерватория студенттерімен және композиторларымен, әуесқой композитор В.Солодовниковпен, И.Киммен, В.Ячменевпен таныстық А.Р.Котельниковтің шығармашылық қызметіне қуатты серпін берді.  Өкінішке орай оның бірқатар туындылары жойылған әрі жоғалған.
1983 жылы ол Алматы консерваториясын, В.Евдокименко сыныбы бойынша тәмамдаған. Өнер ордасындағы оқуын аяқтай салысымен, А.Руфович Оралдағы №2 музыкалық мектебінде қызмет жасаған. Ол музыка мектептеріне арналған әдістемелік құралдар, жаттығулар мен этюдтар құрастырған.

2000 жылы А.Котельников өткен ғасырдың 80 жылдарының аяғы мен 90 жылдардың басындағы қолжазбаларды қалпына келтіре бастады. Осы уақытта оның алғашқы соната, сюита, этюд-экспромттары дүниеге келді. 2005-2006 жылдары А.Руфовичтің түрлі құрамдарға арналған эстрадалық шығармалары да жарық көре бастады.
Композитор 2012 жылы Ресейде өз қаражатымен «Баянға арналған таңдаулы туындылар» атты өзінің алғашқы музыкалық жинағын жарыққа шығарды. Кейін оның атсалысуымен тағы бірнеше жинақ шығарылды. Ол әлі де жеке музыкалық жинақтарын шығаруға дайын екенін айтып отырады.
Қазіргі уақытта А.Р.Котельников Ресесйдің Саратов облысындағы Энгельс қаласында тұрып жатыр. Бірақ әрқашан өзі өскен ортасы, атамекені Қазақстанға бүйрегі бұрып тұрады.
Алексей Руфович бойындағы талантымен түрлі шығармаларды дүниеге әкелді, оның композиторлық қыры өнер адамдары үшін үлгі тұтарлық. Осындай дарынды тұлғаның шығармашылығына қолдау білдіріп, парақшасына жазылайық, достар!
Фейсбук парақшасы: Композитор Алексей Котельников

Құрманғазы атындағы Қазақ ұлттық консерваториясы «Халық музыкасы» факультетінің студенттері Айман Мұхаметқазықызы (баян мамандығы) мен Зарина Жүнісованы (қобыз) және олардың тәлімгері жалпы фортепиано кафедрасының аға оқытушысы А.М. Бақтыгерееваны «Зимняя сказка» халықаралық фестивалінде «Аспаптық музыка, қобыз және фортепиано» номинациясындағы жеңісімен шын жүректен құттықтаймыз! Фестиваль 25 қаңтар күні Алматыда «КҮН ШУАҚ kz» қоғамдық қорының қолдауымен online режимде өтті.