Консерватория жаңалықтары

Құрманғазы атындағы Қазақ ұлттық консерваториясының профессоры, ҚР еңбек сіңірген қайраткері Ерсайын Басықара Ресей Федерациясының Мәдениет министрлігіне қарасты «А.К.Глазунов атындағы Петрозаводск Мемлекеттік консерваториясы» ұйымдастырған Халықаралық байқауда қазылар алқасының құрамында болды. А.А.Репников атындағы «Солтүстік кубогында» халық аспаптарында орындаушылар бақ сынасқан. Ерсайын Бақытұлының жеңімпаздарды анықтау барысында жоғары кәсіби жұмысын ескере отырып, А.К.Глазунов атындағы Петрозаводск Мемлекеттік консерваториясының ректоры Алексей Александрович Кубышкин алғыс хатпен марапаттады.
Профессорымызды Беларусь Республикасы да құр қол қайтармады. «Староборисовка балалар өнер мектебі» ММ мен «Каралі» Беларусь Республикасының еңбек сіңірген әуесқой ұжымы өткізген ІІІ Халықаралық «Туған жердің шабыты» вокалдық әрі аспаптық шығармашылық фестиваль-байқауында Ерсайын Бахытұлына мәдени байланыстарды нығайтуға қосқан үлесі мен белсенділігі үшін алғыс хат табысталды. Алғыс хатты Халықаралық байқаудың директоры Елена Николаевна Любовникова табыстаған.
Алғыс хат иесіне Құрманғазы атындағы Қазақ ұлттық консерваториясының ұжымы да ризашылығын білдіреді. Оқу ордасының атын Халықаралық ареналарда танытып, музыка өнерінің өркендеуіне өз үлесін қосып жүрген әріптесіміздің еңбегі әрдайым бағаланып, мерейі өсе берсін!

Қазақстан Республикасы Мәдениет және спорт министрлігі «Құрманғазы атындағы Қазақ ұлттық консерваториясы» РММ-сі 2021 жылғы түлектерді 2-маусым 2021ж. сағат 15.00-де «Қаржы орталығы» АҚ менеджерлерінің қатысуымен өтетін онлайн іс-шараға қатысуға шақырады.

Бұл іс-шарада оқу бітіретін түлектердің жұмысқа орналасу мәселесі көтеріледі. Құрметті 4 курс студенттері аталған іс-шараның маңыздылығын ескере отырып, толықтай қатысуларыңызды сұраймыз.

Бүгін Нұр-Сұлтан қаласында Солтүстік көрші елден келген қонақтарымыз, Ресей театр өнері институты басшылығымен ҚР Мәдениет және спорт министрі Ақтоты Райымқұлова бастаған Қазақстандағы белді шығармашылық жоғары оқу орындарының басшылары және басқа да өнер ұжымдары өкілдерінің қатысуымен кездесу өтті.

Құрманғазы атындағы Қазақ ұлттық консерваториясының ректоры Арман Жүдебаев, Қазақ ұлттық өнер университетінің ректоры Айман Мұсақожаева, Т.Жүргенов атындағы Қазақ ұлттық өнер академиясының ректоры Ақан Әбдуәлиев, Қазақ ұлттық хореография академиясының ректоры Алтынай Асылмұратова, М.Горький атындағы Мемлекеттік академиялық орыс драма театрының директоры Айболат Жаудыр және ҚР Мәдениет және спорт министрлігінің басқа да өкілдері қатысқан кездесуде Ресейлік әріптестермен жан-жақты пікір алмасып, өзара ынтымақтастықты нығайту мақсатында атқарылатын шаралар жөнінде кеңінен талқыланды.
Кездесу нәтижесі бойынша Қазақстан Республикасы Үкіметі мен Ресей Федерациясы Үкіметі арасындағы 1994-жылдың 28 наурыздағы мәдениет, ғылым және білім саласындағы ұзақ мерзімді ынтымақтастық бағдарламасының негізінде «Ресей театр өнері институты – ГИТИС» және Қазақстан Республикасы Мәдениет және спорт министрлігінің «Құрманғазы атындағы Қазақ ұлттық консерваториясы» Республикалық мемлекеттік мекемесі арасында білім беру және мәдени ынтымақтастықты ілгерілету мақсатында Ынтымақтастық және өзара түсіністік туралы келісімге қол қойылды.
Келісім мақсаты:
-    Бірлескен білім беру жобаларын жүргізу және орындау;
-    Бірлескен шығармашылық жобаларды жүргізу және орындау;
-    Бірлескен ғылыми-зерттеу жобаларын жүргізу және орындау;
-    Екі тарап қызметкерлері, профессорлық-оқытушылық құрамы және студенттері мен білім алушылары арасында тәжірибе алмасу;
-    Академиялық ұтқырлық шеңберінде оқытушылар, докторанттар, магистранттар үшін ғылыми тағылымдама жобаларын жүзеге асыру,
тағы да басқа жобалар. Сондай-ақ, келісім аясында консерватория қабырғасында «Музыкалық театр режиссурасы» мамандығын ашу жоспарланып отыр. Консерватория ректоры Арман Әділханұлы Ресей театр өнері институтының (ГИТИС) ректоры  Григорий Анатольевич Заславскийдің өзара қарым-қатынасты нығайтуға деген ықыласы мен ашық көңіліне өз ризашылығын білдірді.

Қымбатты достар! Жақында Құрманғазы атындағы Қазақ ұлттық консерваториясының студенттері Алматы қаласы әкімдігі мен Алматы телеарнасының бірлесіп ұйымдастырған тележобасы «IQ Almaty» студенттер мен оқушылар арасындағы зияткерлік сайысына қатысты. Консерваториядан құрылған топқа «Студенттер және түлектермен жұмыс жасау бөлімінің» аға менеджері Мадалиев Ержігіт Нұралыұлы жетекшілік етті.
Консерваториямыздың намысын қорғаған "Музыканттар" тобы құрамында Асанбаева Айдана, Шарапи Абылай, Ғимарат Ерназар, Қазкенов Дастан, Шарипова Қарлығаш және Қайыржанова Гүлбағым болды. Біздің студенттер аталмыш сайысқа қатысып қана қоймай, ақтық мәреге дейін жеткен. Зияткерлік сайыстың қалай өткенін алдағы уақытта Almaty телеарнасының эфирінен көре аласыздар.

Бүгін 21 Мамыр - Мәдениет және өнер қызметкерлері күніне орай Құрманғазы атындағы Қазақ ұлттық консерваториясының бірқатар қызметкерлері «Мәдениет саласының үздігі» төсбелгісімен және Қазақстан Республикасы Мәдениет және спорт министрінің Құрмет Грамотасы және Алғыс хаттарымен марапатталды. Марапаттарды консерватория ректоры Арман Жүдебаев табыстады.

Оқу үдерісін жоспарлау және ұйымдастыру қызметінің басшысы Алмагүл Сарымсақова, «Әлеуметтік-гуманитарлық пәндер» кафедрасының меңгерушісі, доцент, философия ғылымдарының докторы Әлима Қайырбекова, «Ішекті аспаптар» кафедрасының доценті Роза Тәкежанова, «Вокалдық өнер» кафедрасының аға оқытушысы Адалят Юсупова, «Халық әні» кафедрасының аға оқытушысы Эльза Қарабалина «Мәдениет саласының үздігі» төсбелгісінің иегерлері атанды.

Мәдениет және өнер саласында атқарған ұзақ жылғы абыройлы еңбегі мен өскелең ұрпаққа еліміздің тарихи құндылықтарын сақтап, саланы дамытуға қосқан елеулі үлесі үшін «Әлеуметтік-гуманитарлық пәндер» кафедрасының профессоры, философия ғылымдарының кандидаты Тамара Сатыбалдина, «Дирижерлеу» кафедрасының доценті Паиза Негманова, «Ансамбль өнері» кафедрасының доценті Гүлбадам Бакиева, «Домбыра» кафедрасының аға оқытушысы Баян Игілік Құрмет Грамоталарымен, ал «Музыкатану және композиция» кафедрасының профессоры, педагогика ғылымдарының кандидаты Тоғжан Оспанова,  «Қобыз және баян» кафедрасының аға оқытушысы Әйгерім Қарсақбаева, «Вокалдық өнер» кафедрасының аға оқытушысы Манарбек Жәлімбетов, «Жалпы фортепиано» кафедрасының аға оқытушысы Ләйлә Жангалина  21 Мамыр - Мәдениет және өнер қызметкерлері күніне орай және еліміздің әлеуметтік-мәдени саласында атқарған ұзақ жылғы абыройлы еңбегі мен өскелең ұрпаққа еліміздің тарихи құндылықтарын сақтап, саланы дамытуға қосқан елеулі үлесі үшін Алғыс хаттарымен марапатталды.

Әріптестерімізді бүгінгі мерекелерімен және қуанышты марапаттарымен шын жүректен құттықтаймыз.

Құрметті достар, әріптестер! Сіздерді 21 мамыр – мәдениет және өнер қызметкерлері күнімен шын жүректен құттықтаймыз!

Өркениетті ұлт, ең алдымен, тарихымен, өнерімен, әлемдік мәдениеттің алтын қорына қосқан үлесімен танылып, бағаланады.
Сондықтан отандық мәдениет пен өнердің дамуына, рухани байлығымыздың еселене түсуіне өлшеусіз үлес қосып жүрген барша мәдениет қызметкерлеріне зор алғыс айтамыз.
Айтулы күні барша мәдениет және өнер қызметкерлерін кәсіби мерекелерімен құттықтап, мәдениетіміздің қазынасына қосқан шығармашылықтарыңызға шалқар шабыт, отбасыларыңызға амандық тілейміз!

Құрметпен,
Құрманғазы атындағы Қазақ ұлттық консерваториясының ұжымы

Роза Құспанқызы 1936 жылы 20 мамырда Орал облысы, бұрынғы Фурманов (қазіргі Жалпақ тал) ауданына қарасты Қарасу ауылында дүниеге келген.
Р. Құспанқызы – елімізге белгілі қобызшы.
1960 жылы Құрманғазы атындағы Қазақ Ұлттық консерваториясының «Ұлт аспаптар» бөлімін қобыз мамандығы бойынша тәмамдаған.
1960-1966 жылдар аралығында «Қазақконцертте» жұмыс істесе, 1966 жылдан 1975 жылға дейін консерваторияның жанында Халық Қазынасы ән-күй мұрасын жиыстыру кабинетінде мәнді де жемісті қызмет жасаған. 1960-1980 жылдар аралығында Лұқановтар ансамблінің мүшелігінде болған.  Сондай-ақ, 1975 жылы Алматы қаласында орналасқан С.Прокофьев атындағы №3-музыка мектебінде алғаш қобыз сыныбын ашып, 41 жыл осы өнер шаңырағында еңбек атқарған. Қазіргі уақытта ол ұлағатты ұстаз әрі зейнеткер. Жарты ғасыр Қазақ өнеріндегі еңбек жолында жастарды білімділікке, шынайы сезімталдыққа, адамгершілікке тәрбиелеп, өзін «Ұстаз» деген ұлағатты есімге лайықты көрсеткен.
Роза Құспанқызы – «Ықыластың қобызы», «Өмірім мен өнерім», «Ғасыр үні – қобыз», «Қобызға арналған хрестоматия», «Сағыныш» (жеке дауысқа арналған әндер) атты кітаптардың авторы.
Ол 1985 жылы «Еңбек ардагері», 1991 жылы «Қазақ ССР халық ағарту ісінің үздігі», 2006 жылы «ҚР Мәдениет қайраткері», 2013 жылы Қазақ өнері мен мәдениетіне сіңірген зор еңбегі үшін және жастар тәрбиесіндегі тәлімгерлігі ерекше «Тұлға» орденімен марапатталған. Сонымен қатар 2016 жылы 80 жасқа толуына байланысты «Ыбырай Алтынсарин» атындағы төсбелгіге ие болған.
     Роза Құспанқызы өз сөзінде: «Маған табиғаттың өзі сыйлаған әнге, өнерге құмарлық қасиеттерімнен болса керек», - дегені бар. Қанмен біткен қасиет жоғалмайды дегендей, өзінің табиғат берген лирикалық даусымен және ән ырғағына беріліп, туа біткен сазгерлік қасиетімен қобызшы бірнеше туындыны жарыққа шығарған. Роза Құспанқызының «Қалқам», «Жазғы кеште», «Ақ жайық», «Қарындас», «Қыз сағынышы» атты тамаша сазды әндері бар.  
Қорқыт бабамыздан бастап Ықылас Дүкенов шығармашылығы арқылы бүгінге жеткен қобыз өнерін құрметтеп, насихаттаушылардың бірі ретінде Роза Құспанқызы қаншама шәкірт тәрбиеліп шығарған. Олар бүгінде өнер саласында жемісті қызмет атқарып келеді.
Ата-бабамызға мирас болған қобызды өмірлік азығына айналдырған Роза Құспанқызы соңынан ерген өнерпаздарға керемет үлгі-өнеге.
Консерватория ұжымы өнер иесін 85 жылдық мерейтойымен шын жүректен құттықтап, мызғымас сабырлық, қайтпас жігер, жайдары көңіл, ұзақ өмір тілейміз! Өміріңіз мәнді, шаңырағыңыз сәнді болсын! Дастарханыңыздан дәм-тұз үзілмей, барыңыз берекеге, берекеңіз мерекеге ұлассын! Төл мейрамыңызбен тағы да құттықтап, алдағы күндерде де абыройыңыздың арта беруіне тілектеспіз!

Бүгін Мәдениет және спорт министрі Ақтоты Рахметоллақызының халық алдындағы кезекті есеп беру кездесуі өтті. Министрліктің Youtube арнасында тікелей эфирде өткен кездесуді консерватория басшылығы тыңдап, өзара пікірлерімен бөлісті.

Министріміз өткен жылғы және 2021 жылдың бірінші тоқсанындағы негізгі жетістіктер туралы айтып, сондай-ақ алға қойылған міндеттерді де тілге тиек етті. Министрліктің барлық қызметі Президентіміз Қасым-Жомарт Кемелұлының Жолдауларына, Тұңғыш Президентіміз, Елбасы Нұрсұлтан Әбішұлы Назарбаевтың «Рухани жаңғыру» және «Ұлы даланың жеті қыры» бағдарламаларына, Nur Otan партиясының сайлауалды тұғырнамасына, стратегиялық және бағдарламалық құжаттарына негізделген. Еліміздің биылғы ең басты ұлттық мерекесі – Тәуелсіздігіміздің 30 жылдығы. Министрлік ұлттық мәдениетті ілгерілетуге және дәстүрлерді жаңғыртуға, салауатты өмір салтын насихаттауға, бұқаралық спортты, оның ішінде ұлттық спорт түрлерін дамытуға, сондай-ақ елдің туристік тартымдылығын арттыруға бағытталған әрбір жоспарлы шараның уақытылы және сапалы өткізілуін қамтамасыз етеді.

Ақтоты Рахметоллақызы: «Мемлекет басшысының «Тәуелсіздік бәрінен қымбат» мақаласында берілген тапсырмасы аясында Наурызды мерекелеуге жаңа форматтағы тұжырымдамалық тәсілдер әзірленді. Республиканың барлық өңірлерінде «Әз Наурыз – ұлттық сананың, ұлттық бірліктің жарқын көрінісі» ұранымен 8 мыңнан астам іс-шара өткізілді. Наурыз мейрамын мерекелеудің үздік дәстүрлерін жаңғырта отырып, балалар үйінің, аз қамтылған және көп балалы отбасылардың балаларына арналған «#Келкөрісейік» қайырымдылық жобалары, этномәдени қойылымдар, ұлттық музыкалық аспаптар фестивалі, ұлттық тағамдар жәрмеңкесі, өлкетану экскурсиялары, бірқатар өңірлерде ағаш отырғызу және т. б. шаралар өткізілді.
2020 жылы Ұлы Абай Құнанбайұлының 175 жылдығы, Әл-Фарабидің 1150 жылдығы және Алтын Орданың («Ұлық ұлыс») 750 жылдығы өткізілді. Жамбыл Жабаевтың 175-жылдық мерейтойына бастау берілді. Сонымен қатар Қазақстанның Халық Қаһарманы Еркеғали Рахмадиевтің 90 жылдығын, белгілі қоғам қайраткері Олжас Сүлейменовтің 85 жылдығын, КСРО-ның Халық әртісі Әлібек Дінішевтің 70 жылдығын, ҚР Еңбек сіңірген қайраткері Батырхан Шүкеновтің 60 жылдығын ұйымдастыру мен өткізу жоспарлануда», - деп алдағы жоспарларына да тоқталып өтті.
Ұйымдастырылып жатқан барлық іс-шаралар өңірлердегі эпидемиологиялық жағдайларды ескеріп, санитарлық-дезинфекциялық режимді сақтай отырып өткізілген.
Министрлік пен ведомство басшылығының жұмыстарына сәттілік тілейміз!

ҚР МжСМ «Құрманғазы атындағы Қазақ ұлттық консерваториясы» Республикалық мемлекеттік мекемесі профессор-оқытушылық құрамының бос лауазымдарына байқау жариялады.