Консерватория жаңалықтары

«Ішекті аспаптар» кафедрасы «Альт» мамандығының 1-курс студенті Алуа Абдрахман (доцент Махмуд Диана Ерболатқызының сыныбы, концертмейстер Елена Шалкова) 2022 жылғы 14 наурызда Германияның Берлин қаласында бейнежазбалар бойынша қашықтық форматында өткен «City Star» Халықаралық онлайн-конкурсында жоғары дәрежеде өнер көрсетіп, 1-дәрежелі лауреат атанды.

2022 жылы 29 сәуірде Құрманғазы атындағы Қазақ ұлттық консерваториясы  Е.Рахмадиевтің 90 жылдығына арналған «Еркеғали Рахмадиев. XXI ғасыр» атты халықаралық ғылыми-практикалық конференция өткізеді. Е.Рахмадиев – қазақ өнері үшін бағасыз үлес қосқан XX ғасырдың басындағы ең жарқын тұлға. Ол қазақ халқының көрнекті композиторы бола отырып, музыка өнеріндегі тұтас бір дәуірдің тұлғасына айналды. Алты операның, соның ішінде «Қамар-сұлу» (1963), «Алпамыс» (1972), «Абылай хан» (1999), көптеген шығармалардың – оркестрлік, вокалдық хор, театрлық-сахналық, камералық -аспаптық, әндер мен романстардың авторы. Еркеғали Рахмадиев симфониялық күйдің жаңа жанрын жасаушы ретінде белгілі, оның осы жанрдағы «Дайрабай» және «Құдаша-думан» атты оркестрлік шығармалары композитор есімін қазақ музыка тарихына алтын әріптермен жазды.

2022 жылдың 21-26 наурыз аралығында Виго Музыка консерваториясында CONSERVATORIO SUPERIOR DE MÚSICA DE VIGO (Виго, Испания) Erasmus+ бағдарламасы аясында өткізілетін орындаушылық өнер бойынша шеберлік сыныптары, лекциялар және өзге де іс-шаралар жоспарлануына орай орындаушылық өнер дәрістерін оқыту әрі ұйымдастырылған кездесулерге қатысу мақсатында өнер-білім ордамыздың бірқатар қызметкерлері мен оқытушылары Испания еліне іссапарға аттанды.

Бүгін еліміздегі ұлттық дәстүрлі өнер мен еуропалық классика өнерін ұштастырып, айрықша музыка феноменін қалыптастырған көшбасшы шығармашылық жоғары оқу орны – Құрманғазы атындағы Қазақ ұлттық консерваториясында ерекше, салтанатты жиын өтті. Өнер шаңырағының Үлкен концерт залына белгілі композитор Еркеғали Рахмадиев есімінің берілу салтанаты көктемгі Наурыз мерекесімен тұспа-тұс келді.
Осындай мерейтойлы күнге және Ұлыстың ұлы күні – әз-Наурыз мерекесінің қарсаңына дөп келген салтанатты жиынға композитор Еркеғали Рахмадиевтің зайыбы Клара апайымыз, Қазақстан Республикасы Мәдениет және спорт министрі Дәурен Әскербекұлы Абаев пен вице-министр Нұрғиса Мұратұлы Дәуешов, қазақтың өнер корифейлері – Асанәлі Әшімов, Нұрғали Нүсіпжанов және қаламыздағы іргелі өнер ордаларының басшылары қатысты.

Құрманғазы атындағы Қазақ ұлттық консерваториясы өз түлектерін өнер-білім ордасының Түлектер қауымдастығына тіркеліп, бірлестік жұмыстарына белсене атсалысуға шақырады. Консерватория сайтындағы «Біз туралы» бөлімнің ішінен «Түлектер қауымдастығы» атты бөлімше ашылып отыр.

Бүгін Құрманғазы атындағы Қазақ ұлттық консерваториясының ұжымы консерватория ректоры Арман Әділханұлы Жүдебаевтың жетекшілігімен Қазақстан Республикасының Президенті Қасым-Жомарт Кемелұлы Тоқаевтың Парламент палаталарының бірлескен отырысында жасаған Қазақстан халқына арналған Жолдауын тыңдады.

2022 жылдың 16 наурызында құмар ойындар мен қаржы пирамидасына қарсы кураторлық сағат өтті.

Бүгін Құрманғазы атындағы Қазақ ұлттық консерваториясының 1-курс студенттеріне арналған «Дін – тәрбиенің рухани тірегі» атты тақырыпта діни экстремизм мен терроризмнің алдын алу бойынша кураторлық сағат ұйымдастырылды.

Құрметті оқырмандар!
    Ғылыми-ақпараттық кітапхана қызметі ТҮРКСОЙ ұйымының Бас хатшысы Қасейінов Дүйсен Құрабайұлының еңбегі мен шығармашылығына арналған «Мәдениет пен өнердің өр тұлғасы – Дүйсен Құрабайұлы 75 жаста» атты  виртуалды кітап көрмесін дайындады.
    Көрмеге кәсіби скрипкашы, ғалым, өнер мен мәдениеттің жанашыры, қоғам қайраткері, 1987-1997 жж. аралығында Құрманғазы атындағы ҚҰК ректоры қызметін атқарған  Д.Қ.Қасейіновтың ҚҰК Ғылыми-ақпараттық кітапхана қызметінде сақталған ғылыми еңбектері, газет-журнал беттеріне жарияланған мақалалары мен сұхбаттары туралы ақпараттар жинақталған.
    Көрмеге қойылған құжаттармен Құрманғазы атындағы КҰК конференц- залында таныса аласыздар және сілтеме арқылы танысуға болады:   http://185.217.181.84:8087/JIrbis2/index.php?option=com_irbis&view=irbis&Itemid=385